Za nama ju XII Kaszëbsczé Diktando. Wszëtczim jegò dobiwcóm Kaszëbskô Jednota gratulérëje. Òsoblëwie należniczce naszi stowôrë – Gracjanie Pòtrëkùs z Plasticznégò Liceùm w Gdinie, chtërna wëgrała w dzélu dlô strzédnëch szkòłów. Terô më mdzemë wiedzelë dze jic za doradą! Chcemë przëpòmnąc, że Gracjana Pòtrëkùs latos dobëła téż nôdgrodã za nôlepszi timik pòézje na Tôrgach Ksążczi w Kòscérznie.
Hewò ji wiérzta:
Cknã
Dzysô cknã tobą
Cknã mamiącą melodią
Nóconą na dobri nocë
Ò wschòdze słuńca
Niewëpitą arbatą
I cknã witrã
Zawiniãtim w papiór zbôjaniów
Z krzëwò pòderzniãtim nadzémkã
Cknã żôłtą kòszulką
Kilométrã teskniącczi
Ùkùszkóną knégą
Cknã redotą czëcégò.
