Wiadło ò tim, że ò òsmë mëliónów, do 107, ùroscą òglowò dëtczi na ùczbã kaszëbsczégò w przédnym rokù, òdsuwô strach Kaszëbów, co béł zrzeszony z rëchlészą prognozą òswiatowi subwencje na 2013 rok, jaką przedstawiło Minysterstwò Nôrodny Edukacje. Kaszëbskò-Pòmòrsczé Zrzeszenié swòje òbrechùnczi zrobiło na spòdlim pòdôwków z Systemë Òswiatowëch Wiadłów.

Rost dëtków na ùczbã kaszëbsczégò je prosto sparłączony z rostã lëczbë ùczącëch są naszégò jãzëka. Nie je leno rzekłé, że ne dëtczi bãdą dobrze wëkòrzëstóné. Jak wskazëjë MEN, ale téż sami szkólny, dzél pieniądzy nie trôfi do szkòłów. Kòżdi radny w gminie miôłbë zacząc sã czerowac za tim, jak ne dëtczi są wëdôwóné przez wëszëznë jegò gminë – gôdôł do Radia Kaszëbë Łukôsz Grãdzëcczi, przédnik Kaszëbskò-Pòmòrsczégò Zrzeszeniô.

Na zôczątkù lëstopadnika Grégór Pòchòpiéń, direchtór departameńtu wespółrobòtë w MEN dôł do wiédzë, że do szkòłów trôfi ò 20% dëtków mni, jak gminë dostôwają ze subwencje.