Mómë prawie roczëznã pòdpisaniô 32 lata temù zélnikòwëch dogôdënków midzë sztrejkùjącyma we Gduńskù robòtnikama a peerelowsczim rządã, jaczé dałë pòczątk dłudżi drodżi do wòlny Pòlsczi. Wôrt je pamiãtac, że wicy, jak 40% sztrejkùjącëch w pòrtach ë stoczniach Gdinie ë Gduńska 32 lata temù, to bëlë Kaszëbi.
Nie zafelało jich westrzód prowadników sztrejkù. Jednym z trzech młodëch chłopów, co stanãlë remiã w remiã z Bògdanã Bòrësewiczã na samim zôczątkù tegò, co miało wëwrócëc do górë nogama kòmùnisticzny pòrządk, béł Ludwik Prądzyńsczi z Kramarzënów kòle Bëtowa. Mielë pò 20 lat – òn, Jerzi Bòrowczôk ë Bògdón Felsczi 14 zélnika we Gduńskù wstrzimelë òd robòtë 18 tësący stoczniowców.
Ti wszëtcë sztrejkùjący wierzelë le czile lëdzóm – Bòrësewiczowi, Pieńkòwsczi, Gwiôzdóm ë Lechòwi Wałãse. Kòżdégò dnia brëkòwalë òni wspiarcégò, téż tegò dëchòwégò. Temù tak wiôlgô w tamtim czasu bëła rola ksãdzów. Pamiãtómë ò nich téż pò tëch 32 latach. Kòcewiôk ks. prałat Jónkòwsczi dożdôł sã nawetka pòmnika, jaczi bãdze witro pòswiãcony kòl kòscoła swiãti Brigitë we Gduńskù. Nie zabelë jesmë ò ksãdzu prałace Hilarze Jastakù, Kaszëbie familią z Kòscérznë, chtëren kòżdégò dnia szedł do robòtników sztrejkùjącëch w Gdinie.
Kù reszce Kaszëbi bëlë téż westrzód doradzającëch Midzëzakładowémù Sztrejkòwémù Kòmitetowi. Nôwëżi z nich béł Lech Bądkòwsczi – tejczasny lider kaszëbskò-pòmòrsczi rësznotë, chtëren òstôł pierszim prasowim rzecznikã Kòmitetu ë redachtorã pismiona Samorządność. Tak tej, czë mómë mòże dosc słëchaniô ò sztridach wkół nastãpny roczëznë zélnikòwëch dogôdënków w 1980 rokù we Gduńskù, chcemë so przëbôczëc ò tëch wszëtczich herojach tamtëch dniów.