„Rebeka” to jedno z wôżniészëch wëdarzeniów dlô kùlturë Zemi Kaszëbsczi. Jakno pierszô w historii òpera je w całoscë przedstawionô w kaszëbsczim jãzëkù. Prapremiera z 13 i 14 gòdnika AD 2014 przëcygnãła do Kaszëbsczi Filharmónie we Wejrowie wielné karno chãtnëch, z chtërnëch dzél ni miôł leżnoscë nabëcô bilietów – taczé bëło zajinteresowanié ùdzélã w tim wëdarzenim.
Wejrowsczé Centrum Kùlturë przërôczëło do produkcji dokôzu ùznónëch ùtwórców, co przëniosło brzôd zrzeszeniô mùzyczi ùsôdcë Michała Dobrzińsczégò do libretto Tomasza Fópczi z przëstãpnoscą òdbiéru całoscë nie czidającë w sztandartë négò ôrtu mùzyczi, co pòdsztrichiwelë i recenzencë, jak téż òbzérnicë.